Rama premton 2500 euro për policinë dhe paralajmëron masa ndaj protestuesve

Kryeministri Edi Rama premtoi një shpërblim prej 2500 eurosh për forcat e policisë gjatë një takimi të hënën, ndërsa i cilësoi protestuesit e rinj si të lidhur me ekstremizmin dhe shërbime të huaja. Pa paraqitur prova konkrete, ai pretendoi se pas mobilizimit të të rinjve qëndrojnë Rusia, Irani apo lëvizja ANTIFA.

Ndërhyrja e kryeministrit vjen gjatë ditës së gjashtë të trazirave në kryeqytet, në një kohë kur Policia e Shtetit po përballet me akuza për përdorim joproporcional të forcës. Gjatë shtatë ditëve të fundit, pamjet filmike dhe dëshmitë kanë ngritur shqetësime për trajtimin e manifestuesve nga policia dhe nga persona civilë të paidentifikuar, përfshirë edhe ndaj personave që nuk ushtronin dhunë. Shoqëria civile, pedagogët dhe aktorët ndërkombëtarë kanë bërë thirrje për uljen e tensioneve dhe ndalimin e dhunës.

Kryeministri paralajmëroi gjithashtu pasoja financiare dhe administrative, duke deklaruar se familjet e të miturve do të paguajnë dëmet e shkaktuara, ndërsa studentët do të humbasin bursat, mbështetjen financiare dhe arsimin falas. Nga ana tjetër, zyra e shtypit e Kryeministrisë deklaroi për BIRN se fjalët e tij duhet të lexohen në kontekstin e akteve të dhunës ndaj punonjësve të policisë dhe jo lidhur me ushtrimin e së drejtës për protestë.

Deklaratat e kreut të qeverisë nxitën reagime kritike nga analistët. Shkrimtari Fatos Lubonja i krahasoi qëndrimet e Ramës me ato të diktatorit Enver Hoxha, duke u shprehur se nxitja e policisë me fjalime e shpërblime tregon kalimin drejt një shteti policor. Po ashtu, studiuesi i antropologjisë Nebi Bardhoshi u shpreh se portretizimi i protestuesve si agjentë apo ekstremistë rrezikon ta çojë vendin në përplasje shoqërore dhe legjitimon dhunën policore.

Zërat

Kryeministri Edi Rama arsyetoi ndërhyrjen e forcave të rendit ndaj kujtdo që ndodhet në shesh: «Çdokush që është në një manifestim të dhunshëm është objekt i policisë së shtetit. Nuk ka aty jo, “unë isha me duar në xhepa. Jo unë isha me duar në sy duke parë atë se si po vret polici”, ti je aty sepse ti je me të. Se në qoftë se ti nuk je me të, ti nuk rri aty».

Lidhur me fjalimin e kryeministrit, Fatos Lubonja tha: «Është një fjalim ku kërcënimit e hapura për çdokënd që guxon të protestojë qoftë edhe paqësisht justifikohen me manipulime dhe gënjeshtra që kërkojnë ta paraqesin protestën me gjuhën që përdorte Enver Hoxha si vepër të armikut të jashtëm dhe të brendshëm».

Ndërsa studiuesi Nebi Bardhoshi komentoi përshkallëzimin e retorikës zyrtare: «Tani jemi në kulmim të kësaj gjuhe. Portretizimi i protestuesve ai agjentë, terroristë, të paditur etj. është e ndërtuar në mënyrë të tillë që të legjitimoj dhunën policore në çdo nivel, deri në brutalitet, siç dhe ka ndodhur tashmë».