Këshilli i Evropës: Ndërhyrjet politike përkeqësojnë lirinë e mediave
Raporti vë në pah ndërhyrjet politike dhe sulmet verbale, ndërsa Ehat Miftaraj kërkon ndarjen e gazetarëve nga aktivistët e influencerët.
PRISHTINË — Misioni faktmbledhës i Platformës së Këshillit të Evropës për Sigurinë e Gazetarëve ka publikuar raportin me titull “Kosovë: Rikthimi i lirisë së mediave pas rënies”. Sipas raportit të publikuar të hënën, liria e medias në Kosovë ka shënuar përkeqësim si pasojë e ndërhyrjeve të shumta politike.
Në gjetjet e këtij dokumenti theksohet gjithashtu se liria e medias është cenuar nga sulmet verbale ndaj gazetarëve dhe dobësimi i pavarësisë së institucioneve mediale në vend. Kjo situatë vjen pas shqetësimeve të vazhdueshme rreth sigurisë dhe rasteve të raportuara për sulme ndaj gazetarëve.
Për këtë raport ka folur edhe Ehat Miftaraj nga Instituti i Kosovës për Drejtësi në emisionin “Pressing”. Ai ka deklaruar se në të ardhmen është e nevojshme të bëhet një dallim i qartë në mes të aktivistëve të shoqërisë civile, gazetarëve dhe influencerëve.
Burim: Gazeta Blic
— Redaksia ZHURMA