Kasami takon myftiun e mitropolitin për incidentet ndëretnike në Tetovë

TETOVË — Kryetari i Komunës së Tetovës, Bilall Kasami, ka zhvilluar një takim me myftiun e Tetovës, Selver Xhemaili, dhe mitropolitin e Eparhisë së Tetovës dhe Gostivarit, Josif, për të diskutuar rreth incidenteve të fundit ndëretnike në qytet. Gjatë këtij takimi, ngjarjet janë cilësuar si raste të izoluara, ndërsa u theksua se disa persona po përpiqen t'i shfrytëzojnë ato për qëllimet e tyre.

Pas takimit, drejtuesit kanë përcjellë një mesazh të përbashkët për paqe, tolerancë dhe mirëkuptim ndërmjet komuniteteve, duke shtuar se siguria dhe bashkëjetesa janë përgjegjësi e të gjithë qytetarëve. U vlerësua se qyteti mbetet shembull i bashkëjetesës dhe u porosit se nuk do të lejohet keqpërdorimi i fëmijëve për nxitjen e tensioneve, ndërsa u bë thirrje për qetësi dhe përgjegjësi.