Sveçla pas dy dështimeve: Konkursi për rreshter mundësi e re për avancim

Procesi i ri i gradimit për rreshter në Policinë e Kosovës është shpallur sërish, pasi dy përpjekjet paraprake kishin dështuar për shkak të shkeljeve ligjore. Ministri i Punëve të Brendshme, Xhelal Sveçla, ka mirëpritur këtë zhvillim duke e cilësuar si një mundësi të rëndësishme për avancimin në karrierë të zyrtarëve policorë.

Sveçla theksoi se ky proces është i rëndësishëm për zyrtarët që shërbejnë me profesionalizëm dhe përgjegjësi për sigurinë e qytetarëve dhe të vendit. «Avancimi profesional dhe vlerësimi i meritës janë thelbësorë për fuqizimin e Policisë së Kosovës dhe motivimin e pjesëtarëve të saj për të vazhduar shërbimin me përkushtim», ka shkruar ai. Gjithashtu, ministri inkurajoi gratë dhe vajzat që të aplikojnë për të kontribuar në përfaqësimin dhe fuqizimin e tyre brenda forcës policore.