Ilire Dauti i kundërpërgjigjet Maksim Dimitrievskit për shqiptarët

Deputetja e Lidhjes Shqiptare, Ilire Dauti, ka reaguar ashpër ndaj deklaratës së liderit të ZNAM-it, Maksim Dimitrievski, i cili u referua shqiptarëve si «një grup i vogël qytetarësh». Ky reagim vjen në kuadër të përplasjeve politike për statusin dhe përdorimin e gjuhës shqipe në Maqedoninë e Veriut, teksa Dimitrievski ka paralajmëruar largimin nga qeveria nëse provimi i jurisprudencës mbahet edhe në gjuhën shqipe.

Dauti e ka akuzuar Dimitrievskin për minimizim të shqiptarëve përmes retorikës politike, duke i rikujtuar peshën demografike në vend. Ajo ka paraqitur llogaritjen përmes formulës sipas të cilës shqiptarët përbëjnë 54.4% të numrit të maqedonasve. «Një grup që përbën mbi 54% të numrit tuaj vështirë se mund të quhet i vogël, përveçse në matematikën tuaj politike, e cila duket se nuk ju funksionon», ka deklaruar ajo, duke i bërë thirrje të tregojë kujdes kur flet për shqiptarët dhe gjuhën shqipe, pavarësisht nëse qëndron apo jo në Qeveri.