Kandidati për president i Austrisë mbështet Marjana Koçekun

Një përplasje në rrjetin social X mes deputetes së pavarur Marjana Koçeku dhe Vladimir Štimac ka tërhequr vëmendjen ndërkombëtare mbi statusin e Kosovës dhe lëvizjet studentore serbe. Debati nisi pasi Štimac deklaroi se Kosova do të mbetet pjesë e Serbisë, ndërsa deputetja shqiptare i kundërshtoi pretendimet territoriale, duke i quajtur të papajtueshme me demokratizimin e vendit. Koçeku theksoi se ndryshimi politik në Serbi nuk mund të kushtëzohet vetëm nga largimi i presidentit Aleksandar Vuçiç, por kërkon distancim nga retorika nacionaliste dhe njohjen e pavarësisë së Kosovës.

Gjatë diskutimit, deputetja kërkoi gjithashtu përgjegjësi për krimet e luftës, përfshirë vrasjet e civilëve, personat e zhdukur dhe dhunën seksuale, ndërsa ngriti shqetësimin për pasivizimin e adresave të shqiptarëve në Luginën e Preshevës krahasuar me mbrojtjen e të drejtave për serbët në Kosovë. Reagimi i saj u shpërnda nga ish-ambasadorja e Bashkimit Europian në Shqipëri, Romana Vlahutin, e cila e vlerësoi si mesazh të brezit të ri.

Në mbështetje të qëndrimit të saj ka dalë edhe Günther Fehlinger-Jahn, kryetar i Komitetit Austriak për Zgjerimin e NATO-s dhe kandidat i vetëshpallur për president të Austrisë në zgjedhjet e vitit 2028. Diskutimi ka rihapur çështjen nëse forcat e reja demokratike në Serbi do të ndryshojnë qasjen tradicionale ndaj sovranitetit të Kosovës.