Kanalizimet në Gjakovë: Mbeturinat blokojnë puseta
KRU "Gjakova" paralajmëron masa ligjore pas rastit të dytë brenda një viti në të njëjtin vend.
GJAKOVË — Ekipet e KRU "Gjakova" kanë larguar sasi të mëdha mbeturinash nga tri puseta të kanalizimit në rrugën "Ali Pashë Tepelena", të cilat ishin bllokuar. Punëtorët kanë punuar për orë të tëra me mjete të ndryshme për të rikthyer funksionimin normal të rrjetit.
Nga pusetat janë hequr kartonë, gurë, shishe qelqi, plastikë, shkopinj dhe hekurë me gjatësi deri në 1.5 metra. KRU "Gjakova" thekson se hedhja e mbeturinave në kanalizim shkakton dëme serioze në sistemin e ujërave të ndotura dhe të kolektorëve, duke rrezikuar funksionimin e rrjetit dhe duke krijuar pasoja për qytetarët.
Kompania thekson se ky është rasti i dytë brenda një viti që në këtë lokacion hasen mbeturina të tilla, çka tregon një sjellje të përsëritur dhe të papërgjegjshme. KRU "Gjakova" u ka bërë thirrje qytetarëve të mos hedhin mbeturina në rrjetin e kanalizimit dhe ka paralajmëruar se, në rast përsëritjeje, do të ndërmarrë masa ligjore e do të paraqesë kallëzime ndaj personave përgjegjës.
Burim: Zëri
— Redaksia ZHURMA