Kampusi i ri prej 42 milionë eurosh zgjidh hapësirat në UNT
VLEN ndërmerr hapa për nevojat e Universitetit “Nënë Tereza”, ndërsa projekti i ri përfshin investim madhor.
Redaksia ZHURMA · · 1 min lexim
Koalicioni VLEN ka njoftuar se po ndërmerr hapa konkretë për të adresuar mungesën e hapësirave shtesë në Universitetin “Nënë Tereza”, shkaku i shtimit të numrit të studentëve. Gjatë këtij angazhimi, zëvendëskryeministri i parë Bekim Sali dhe rektori i këtij universiteti, prof. dr. Bekim Fetaji, kanë shqyrtuar mundësinë e shfrytëzimit të mjediseve të Lidhjes së Sindikatave të Maqedonisë, gjë që do të mundësojë mbarëvajtjen e procesit mësimor derisa të përfundojë ndërtimi i kampusit të ri.
Ndërkohë, investimi për kampusin e ri përllogaritet në rreth 42 milionë euro, për të cilin tashmë janë vendosur themelet. Ky projekt i përhershëm synon t'i sigurojë institucionit kapacitete bashkëkohore për studentët, trupin akademik, mësimdhënien, si dhe për kërkimin shkencor.
