Jakup Huseini: Bërvenica meriton më shumë, bashkë mund ta çojmë përpara

Në tubimin përmbyllës të fushatës për zgjedhjet lokale, kandidati i VLEN-it për të parin e Komunës së Bërvenicës, Jakup Huseini, ka kërkuar mbështetjen e banorëve për të jetësuar planin e tij zhvillimor. Gjatë këtij takimi, ai premtoi angazhim për një administratë lokale më efektive dhe transparente, e cila do të gjendet në shërbim të të gjithë qytetarëve pa dallime.

Huseini bëri të ditur se platforma e tij politike buron drejtpërdrejt nga kërkesat dhe hallet e adresuara prej banorëve, duke garantuar se asnjë shqetësim nuk do të mbetet pa vëmendje. «Kam dëgjuar më shumë sesa kam folur. Kam pyetur më shumë sesa kam premtuar», u shpreh ai para të pranishmërve, duke theksuar qasjen e tij se çdo kërkesë e qytetarëve do të trajtohet me prioritet.

Në fokus të programit të tij janë ngritja e cilësisë së infrastrukturës, përmirësimi i shërbimeve publike, si dhe hapja e dyerve për investime të reja që gjenerojnë mundësi më të mira për familjet dhe rininë. Gjithashtu, ai vuri theksin te rëndësia e bashkëpunimit të ngushtë me pushtetin qendror dhe mbështetjen institucionale nga koalicioni VLEN, elementë që sipas tij janë kyç për jetësimin e nismave konkrete.

Duke kërkuar diçka më shumë sesa thjesht një mandat udhëheqës, Huseini u bëri thirrje qytetarëve që së bashku të punojnë për të shndërruar projektet në punë të kryera dhe premtimet në fakte të prekshme për komunën.