Pse u sëmur me kancer ish-oficeri italian pasi shërbeu në Gjakovë?

— Gjakovë, 20 korrik. Një ish-oficer i Forcave Ajrore Italiane, Nunzio Santucci, ka fituar një betejë me shtetin italian pasi gjykata vendosi se kanceri i tij nga i cili u prek lidhet me misionin paqëruajtës që kreu në Kosovë. Ai do të përfitojë rreth 300 mijë euro dëmshpërblim, së bashku me pagesat e prapambetura dhe pension të përjetshëm.

Për më shumë se 30 vjet, Santucci i shërbeu shtetit italian si pjesë e Forcave Ajrore, duke mbajtur detyra operative dhe drejtuese. Gjatë karrierës së tij ai drejtoi Grupin e Mbrojtjes në aeroportin e Gjakovës, në Kosovë, gjatë misionit ndërkombëtar “Joint Guardian”.

Santucci u diagnostikua me kancer në stomak në vitin 2013. Ai iu nënshtrua një ndërhyrjeje kirurgjikale ku iu hoq një pjesë e stomakut, ndërsa në vitet që pasuan kreu edhe dy operacione të tjera për shkak të komplikimeve të sëmundjes.

Gjykata e Velletrit njohu statusin “Viktimë e Detyrës” të Santuccit dhe një invaliditet të përhershëm prej 65%. Vendimi i jep atij të drejtën të përfitojë një dëmshpërblim të veçantë, pagesat e prapambetura dhe një pension të përjetshëm, me një vlerë totale rreth 300 mijë euro.

Avokati i Santuccit, Ezio Bonanni, deklaroi se ky vendim i rikthen dinjitetin dhe krijon një precedent të rëndësishëm për të gjithë ushtarakët që kanë shërbyer në Ballkan dhe ende presin drejtësi.

Burim: Shqiptarja, https://shqiptarja.com/lajm/u-semur-me-kancer-pasi-sherbeu-ne-gjakove-gjykata-ne-itali-demshperblen-me-300-mije-euro-ish-komandantin-75-vjecar — Redaksia ZHURMA