Ish-medresantët kthehen në banka pas 30 vjetësh — Shemsi Rrahimi u mban orë mësimi
Ish-nxënësit e gjeneratës së 30-të u pritën nga kujdestari i tyre Shemsi Rrahimi, i cili mbajti një orë simbolike në ambientet e shkollës në Prishtinë.
PRISHTINË — Ish-nxënësit e një klase të gjeneratës së 30-të të Medresesë "Alauddin" në Prishtinë janë mbledhur në ambientet e shkollës për të shënuar 30-vjetorin e përfundimit të shkollimit të tyre. Ish-medresantët organizuan këtë takim për të kujtuar përvojat dhe kohën e kaluar së bashku në këtë institucion arsimor.
Ata u pritën nga ish-kujdestari i tyre i klasës, profesori Shemsi Rrahimi, i cili mbajti një orë mësimore simbolike me ish-nxënësit. Ky takim u nderua edhe nga drejtori aktual i shkollës, i cili u doli në pritje dhe theksoi se dyert e Medresesë mbeten gjithmonë të hapura për të gjithë ish-nxënësit e saj.
Gjatë bashkëbisedimit, pjesëmarrësit ndanë kujtime nga ditët e rinisë dhe treguan për rrugëtimin e tyre profesional. Ish-medresantët theksuan se vlerat dhe edukimi i fituar në këtë shkollë kanë shërbyer si një bazë e rëndësishme për sukseset dhe arritjet e tyre të mëvonshme në jetë.
Burim: LuginaPress
— Redaksia ZHURMA
