Ina Kosturi luan veprat e saj në 'Mozarthaus' të Vjenës
Violinistja shqiptare u shoqërua nga pianistja japoneze Maya Purdue në festivalin 'Violinistic Greetings'.
VJENË — Violinistja shqiptare Ina Kosturi ka prezantuar krijimtarinë e saj në sallën e koncerteve të „Mozarthaus” në Vjenë, ku interpretoi vepra solo të shoqëruara nga pianistja japoneze Maya Purdue. Recitali u mbajt në kuadër të festivalit „Violinistic Greetings”, duke ndërthurur repertorin klasik me atë bashkëkohor.
Gjatë koncertit u luajtën tri vepra solo të kompozuara nga Kosturi, të cilat janë botuar nga shtëpia botuese „Universal Edition” në Vjenë. Artistja shqiptare performoi gjithashtu veprën e famshme „Ciaccona” të Johann Sebastian Bach, një nga pjesët kryesore të repertorit botëror.
Kosturi u nderua së fundmi me Medaljen e Artë për interpretim dhe kompozim nga „European International Music Award” në Londër për veprën e saj „7 Capriccio”. Koncerti u mbyll me interpretimin e veprës „Crystal” të kompozitores Katharina Nohl.
Burim: ATSH
— Redaksia ZHURMA
