"Albanians for America" kërkon rikthimin e dialogut strategjik me ShBA-në
Delegacioni i organizatës u takua në Prishtinë me të ngarkuarën me punë të ShBA-së, Anu Prattipati, për të diskutuar investimet dhe sektorin e energjisë.
PRISHTINË — Delegacioni i organizatës shqiptaro-amerikane “Albanians for America” ka kërkuar rifillimin e Dialogut Strategjik ndërmjet Kosovës dhe Shteteve të Bashkuara të Amerikës. Kjo kërkesë u shpalos gjatë një takimi të zhvilluar në Prishtinë me të ngarkuarën me punë të ShBA-së në Kosovë, Anu Prattipati.
Përfaqësuesit e organizatës Gino Mulliqi, Gëzim Rushiti dhe Janinë Memeti diskutuan me diplomaten amerikane edhe për zgjerimin e bashkëpunimit ekonomik. Sipas tyre, qeverisja e qëndrueshme dhe funksionimi i mirë i institucioneve janë faktorë kyç për rritjen e besimit të investitorëve të huaj.
Gjithashtu, palët diskutuan për rëndësinë e investimeve në sektorin e energjisë, përfshirë projektet që lidhen me gazin natyror të lëngshëm dhe krijimin e vendeve të reja të punës. Delegacioni i organizatës riafirmoi përkushtimin për thellimin e bashkëpunimit dypalësh dhe shprehu mirënjohje për mbështetjen e vazhdueshme amerikane.
Burim: Epoka e Re
— Redaksia ZHURMA