Ilir Panda merr drejtimin e Gjykatës së Lartë

Sokol Sadushi i ka dorëzuar zyrtarisht detyrën e Kryetarit të Gjykatës së Lartë Ilir Pandës, në një ceremoni të zhvilluar në Sallën e Kolegjeve të Bashkuara. Në ceremoni morën pjesë gjyqtarët e Gjykatës së Lartë, këshilltarët ligjorë dhe punonjës të administratës së institucionit.

Ky kalim detyre shënon përfundimin e mandatit gjashtëvjeçar të Sadushit në krye të gjykatës. Gjatë kësaj periudhe, sipas institucionit, sfidat kryesore ishin pakësimi i dosjeve të prapambetura, ngritja e cilësisë së vendimeve dhe forcimi i transparencës ndaj publikut. Sadushi kujtoi vështirësitë e nisjes kur gjykata funksiononte me vetëm një gjyqtar dhe mijëra dosje në pritje, ndërsa njoftoi se do të vazhdojë kontributin e tij si gjyqtar.

Kryetari i ri, Ilir Panda, u zgjodh nga trupa e gjyqtarëve të Gjykatës së Lartë gjatë Mbledhjes së Përgjithshme, ku kandidatura e tij mori mbështetjen unanime të votave të hedhura. Ai e përshkroi detyrën si një përgjegjësi të madhe përballë Kushtetutës dhe qytetarëve, duke theksuar nevojën për standarde të larta të vendimmarrjes dhe administrim efikas të proceseve gjyqësore për të garantuar drejtësi të paanshme e të besueshme.