Mickoski thotë se çmimi i rrymës nuk ndryshon deri në fund të vitit

Çmimi i energjisë elektrike për qytetarët do të mbetet i pandryshuar deri në përfundim të këtij viti, ndërsa Qeveria synon të luftojë që të mos ketë shtrenjtim as pas datës një janar. Kështu deklaroi kryeministri Hristijan Mickoski duke iu përgjigjur pyetjeve të gazetarëve lidhur me procesin e përcaktimit të çmimit të rrymës, procedurë kjo e nisur nga kompanitë energjetike pranë Komisionit Rregullator për Energjetikë.

Sipas kreut të ekzekutivit, mbrojtja e standardit të qytetarëve dhe stabiliteti energjetik po mbahen në kushtet e një krize globale, gjatë së cilës çmimet në tregje shënojnë rekorde. Ai përmendi si krahasim çmimet e karburanteve në shtetet evropiane që kalojnë tre euro për litër, ndërsa në vend çmimi mbetet nën 1,6 euro falë masave qeveritare, duke shtuar se synimi mbetet zbatimi i kësaj qasjeje edhe te energjia elektrike.

Në lidhje me SHA EMV dhe çmimin aktual prej 65 eurosh për megavat-orë, Mickoski theksoi se ky çmim është deri në tri herë më i ulët se ai që paguajnë qytetarët në shtetet fqinje dhe në Evropë. Ai sqaroi se çmimi përfundimtar nuk varet vetëm nga EMV-ja, por edhe nga kërkesat e subjekteve të tjera në sistemin energjetik, përfshirë operatorin dhe distributorin privat EVN.