IdentiTek: Kodi i ri PP në pasaporta nuk është gabim printimi
Kompania sqaron se ndryshimi i kodit në pasaportat e reja vjen si pasojë e përditësimit të standardeve ndërkombëtare të ICAO-s.
Redaksia ZHURMA · · 2 min lexim
IdentiTek ka reaguar lidhur me ndryshimin e vërejtur në pasaportat e reja shqiptare, ku shënimi i mëparshëm «P» është zëvendësuar me kodin «PP». Sipas kompanisë, ky ndryshim nuk përbën gabim në printim, por është rezultat i përditësimit të standardeve ndërkombëtare për dokumentet e udhëtimit të lexueshme nga makinat.
Ndryshimi është kryer në zbatim të kërkesave të Organizatës Ndërkombëtare të Aviacionit Civil, e cila në mars të vitit 2024 miratoi përditësime në standardet teknike. Pasaportat e zakonshme identifikohen me kodin «PP», ndërsa pasaportat e shërbimit kanë kaluar nga shënimi «PS» në «PO», ku shkronja e parë tregon llojin e dokumentit dhe e dyta përcakton kategorinë.
Formati i ri ka nisur të aplikohet në Shqipëri që prej dhjetorit 2025, përpara afatit të përcaktuar nga ICAO më 1 janar 2026, dhe deri më tani janë prodhuar mbi 300 mijë pasaporta me kodet e reja. Gjithashtu, Shqipëria është anëtarësuar në mars të vitit 2025 në Drejtorinë Publike të Çelësave të ICAO-s, një sistem që mundëson verifikimin elektronik të autenticitetit të pasaportave biometrike dhe të dhënave në çipin e tyre për të rritur sigurinë e dokumenteve.