I dyshuari për spiunazh ishte shkarkuar nga një këshill pranë Presidencës në 2024
Fehim Sali u arrestua në pikën kufitare të Merdarit; ishte anëtar i Këshillit Konsultativ për Komunitete deri para dy vjetësh.
Policia e Kosovës ka arrestuar shtetasin Fehim Sali nën dyshimin për kryerjen e veprës penale të spiunazhit. Arrestimi u krye në pikën kufitare në Merdar të Podujevës, me urdhër të Prokurorisë Speciale të Republikës së Kosovës.
Sipas të dhënave zyrtare, Sali kishte qenë anëtar i Këshillit Konsultativ për Komunitete (KKK), që vepron nën autoritetin e Presidentit të Kosovës, si përfaqësues i komunitetit goran për dy mandate (2020–2022 dhe 2022–2024). Sipas Presidencës, ai u shkarkua nga këshilli më 3 maj 2024.
Vlora Konushevci, këshilltare për media e presidentes në detyrë Albulena Haxhiu, tha për Radion Evropa e Lirë: "Pas raportit të informacioneve të sigurisë dhe me propozimin e sekretarit të Këshillit, i njëjti është shkarkuar më 3 maj 2024, rrjedhimisht prej asaj kohe nuk është anëtar i Këshillit Konsultativ për Komunitete", duke shtuar se nuk mund të japin detaje të tjera mbi raportin.
Policia dhe Prokuroria Speciale nuk kanë dhënë detaje se për çfarë aktivitetesh saktësisht dyshohet i arrestuari, as nëse rasti lidhet me ndonjë shërbim të huaj inteligjence. Gjatë bastisjes në vendbanimin e tij në Dragash, hetuesit sekuestruan 39.500 euro para të gatshme, 500 dinarë serbë dhe katër telefona celularë. I dyshuari u ndalua për 48 orë.
Sipas Kodit Penal të Kosovës, spiunazhi konsiderohet vepër e rëndë penale dhe, në rast dënimi, mund të sjellë të paktën pesë vjet burgim.
Burimet: Ekonomia Online, Gazeta Dukagjini, Telegrafi, Bota Sot.