Huta: Po provoj të bëj fëmijë të dytë përmes IVF-it në Turqi

Këngëtarja Orinda Huta deklaroi se po provon të bëjë një fëmijë të dytë përmes procedurës IVF në një klinikë në Turqi. Këtë vendim ajo e mori pas katër tentativave të pasuksesshme të realizuara në Shqipëri, duke konfirmuar se dëshira e saj dhe e partnerit për të zgjeruar familjen mbetet e madhe.

Përpjekjet e mëparshme mjekësore në Shqipëri nuk patën sukses për këngëtaren. Huta tregoi se një nga momentet më të vështira të këtij rrugëtimi ishte data 30 dhjetor, ditë kur mori një telefonatë nga stofi mjekësor që e njoftoi se stimulimi nuk kishte shkuar mirë. Pas atij zhgënjimi, asaj iu desh një vit i plotë për t'u rikuperuar emocionalisht dhe për të vendosur për rinisjen e procedurave.

Gjatë rrëfimit të saj në emisionin «Goca dhe Gra», Huta sqaroi se i është drejtuar klinikës jashtë vendit pasi në Shqipëri u ndie e padëgjuar nga mjekët. Ajo tha se mjekët e trajtonin rastin e saj thjesht me statistika të përgjithshme, ndërkohë që ajo kërkonte përgjigje për reagimet e trupit të saj. Këngëtarja theksoi se protokolli mjekësor nuk mund të jetë i njëjtë për çdo paciente që përballet me këto vështirësi. Sipas saj, vendimi për të shkuar në Turqi erdhi pasi mori një ftesë nga vetë klinika turke për të provuar procesin atje.

Lidhur me të ardhmen e këtij rrugëtimi mjekësor, Huta bëri të ditur se do të vazhdojë të përpiqet për sa kohë që trupi ia mundëson këtë proces. Ajo u shpreh se mbetet me shpresë se do të marrë lajmin e dëshiruar me lutje te Zoti, ndonëse shtoi se nëse diçka nuk është e shkruar të ndodhë, nuk duhet sforcuar më tej.

«Po provoj dhe do të provoj akoma. Unë e dua shumë një fëmijë të dytë dhe, për sa kohë që trupi na e mundëson akoma dhe me lutje te Zoti, ajo do të ndodhë. Mendoj se nuk duhet të dorëzohemi. Sot ka shumë vështirësi për gratë dhe nuk gjejnë përgjigje se pse po u ndodh kjo. Tani kam filluar të provoj në Turqi dhe po përpiqem atje. E provova katër herë në Shqipëri dhe nuk ia dola. Në momentin që nuk doja ta provoja më, sepse pata një zhgënjim herën e fundit, u ndjeva e padëgjuar… sepse ti fillon të kuptosh trupin tënd dhe bën pyetje, ndërsa doktori të thotë ‘Ja, kështu janë statistikat’, dhe ti fillon të kthehesh në një statistikë. Nuk mund të jetë i njëjti protokoll për çdo paciente. Ditën kur mora vesh që stimulimi nuk shkoi mirë, mbaj mend që ka qenë data 30 dhjetor. Mora telefonatën dhe më thanë ‘Orinda, nuk ia dola dot’. M’u desh një vit për të rinisur, me kërkesë të klinikës në Turqi që më tha ‘Eja, provoje njëherë te ne’. Tani shpresojmë dhe, nëse Zoti nuk do, mos e sforco atë…», deklaroi Orinda Huta.