Hoxha takon Neculăescu në Bukuresht për integrimin evropian

Ministri për Evropën dhe Punët e Jashtme, Ferit Hoxha, u takua në Bukuresht me ministrin e ri të Punëve të Jashtme të Rumanisë, Dan Neculăescu, për të diskutuar mbi bashkëpunimin dypalësh dhe sfidat e sigurisë. Gjatë takimit u rikonfirmua angazhimi i përbashkët për të thelluar marrëdhëniet ekonomike dhe tregtare, si dhe për të shfrytëzuar plotësisht potencialin e tyre ndërmjet dy vendeve.

Hoxha vlerësoi lart mbështetjen e vazhdueshme të Rumanisë për rrugëtimin evropian të Shqipërisë dhe procesin e zgjerimit të Bashkimit Evropian në tërësi. «Së bashku, mbetemi të angazhuar për të çuar përpara integrimin evropian dhe për të forcuar sigurinë, stabilitetin dhe bashkëpunimin në Ballkanin Perëndimor», u shpreh ministri.

Gjatë bisedimeve, dy homologët shkëmbyen pikëpamje mbi zhvillimet e sigurisë në rajon dhe në arenën ndërkombëtare, ndërsa u vu theksi te rëndësia e unitetit mes aleatëve dhe koordinimit brenda NATO-s. Përmes një deklarate, u theksua mbështetja e palëkundur për Ukrainën dhe solidariteti i Shqipërisë me Rumaninë përballë sfidave të sigurisë në rajonin e Detit të Zi.