Hoxha: Rajoni dhe integrimi evropian duhet të ecin krah për krah
Ministri Ferit Hoxha kërkoi në Bukuresht forcimin e bashkëpunimit rajonal gjatë takimit të Nismës së Evropës Qendrore.
Redaksia ZHURMA · · 1 min lexim
Ministri për Evropën dhe Punët e Jashtme, Ferit Hoxha, mori pjesë në takimin Ministror të Nismës së Evropës Qendrore që u zhvillua në Bukuresht të Rumanisë. Sipas tij, në një kohë kur peizazhi i sigurisë dhe ai gjeopolitik i Evropës po riformësohen thellësisht, bashkëpunimi rajonal është më i rëndësishëm se kurrë.
Hoxha u shpreh se Nisma e Evropës Qendrore mbetet një platformë e çmuar për forcimin e dialogut, ndërlidhjes dhe bashkëpunimit, duke çuar përpara aspiratat evropiane të vendeve anëtare. «Bashkëpunimi rajonal dhe integrimi evropian duhet të ecin krah për krah», theksoi ministri, duke shtuar se rajoni nuk mund të bëhet plotësisht evropian nëse vendet mbeten të distancuara nga njëri-tjetri.
Sipas tij, heqja e barrierave tregtare, ndërlidhja e sistemeve energjetike, korridoreve të transportit, njohja e kualifikimeve profesionale dhe forcimi i ndërlidhjes digjitale nuk janë alternativa ndaj Bashkimit Evropian, por përgatitje që rajoni të funksionojë si pjesë e tij. Ai shtoi se ekonomitë e ndërlidhura ndërtojnë një rajon më të fortë dhe një Evropë më të sigurt e të qëndrueshme.
