Bylykbashi: PS po shmang rekomandimet e OSBE/ODIHR për reformën zgjedhore

Bashkëkryetari i Komisionit për Reformën Zgjedhore, Oerd Bylykbashi, ka akuzuar Partinë Socialiste se po bllokon punën në komision duke shmangur zbatimin e rekomandimeve të OSBE/ODIHR, ndërsa kërkon ndarjen e shtetit nga partia në pushtet dhe vendosjen e sistemit me proporcional kombëtar e lista të hapura për zgjedhjet e 9 majit 2027.

Komisioni i Posaçëm për Reformën Zgjedhore është ngritur një vit më parë me dakordësinë e dy partive të mëdha politike me mandat parësor zbatimin e rekomandimeve të OSBE/ODIHR. Që nga krijimi i tij, i vetmi produkt i këtij trupi ka qenë një draft i ligjit për financimin e partive politike. Prodhimi i këtij drafti erdhi pas muajsh të tërë ndërprerjeje të punimeve parlamentare. Ndërkohë, reforma e sistemit zgjedhor dhe ndryshimet në Kodin Zgjedhor kërkohen prej vitesh nga opozita, si dhe prej muajsh nga studentët dhe protestuesit në vend. Zgjedhjet e ardhshme parlamentare janë caktuar të mbahen më 9 maj 2027.

Oerd Bylykbashi deklaroi se garantimi i kushteve të barabarta të konkurrimit zgjedhor mbetet çështja kryesore e evidentuar në raportin e OSBE/ODIHR, si dhe në raportet e Asamblesë Parlamentare të Këshillit të Europës, Parlamentit Europian dhe Komisionit Europian. Ai tha se kjo kërkon ndarjen reale të shtetit nga partia në pushtet, ndalimin e abuzimit me burimet shtetërore e administratën publike në favor të Partisë Socialiste apo cilësdo parti në pushtet, si dhe ndëshkimin e ashpër të patronazhistëve e shkelësve të ligjit. Po ashtu, Bylykbashi bëri të ditur se Partia Demokratike kërkon një sistem të ri zgjedhor mbi bazën e proporcionalitetit kombëtar me lista të hapura për Kuvendin dhe këshillat bashkiakë, si dhe me më pak barriera për partitë garuese. Ai akuzoi mazhorancën se po trajton çështje dytësore që nuk burojnë nga OSBE/ODIHR, duke ndjekur të njëjtën linjë që çoi në dështimin e Komisionit për Reformën Territoriale dhe ndryshimet e njëanshme me zhdukjen e 15 bashkive. Nga ana tjetër, Partia Socialiste ka deklaruar se nuk do ta shtyjë punën e komisionit përtej muajit nëntor dhe se do të vijojë e vetme ndryshimet në Kod nëse PD nuk dakordësohet.

Komisioni i Posaçëm për Reformën Zgjedhore rinis zyrtarisht punën të hënën, më 9 nëntor, në orën 13:00. Në këtë mbledhje është parashikuar të diskutohen detyrimet që rrjedhin nga legjislacioni për vetëqeverisjen vendore, projektligji për financimin e partive politike dhe çështjet e mbetura të reformës, ndërsa trupi ka hyrë në muajin e fundit të mandatit të tij zyrtar. Partia Demokratike ka njoftuar se do të paraqesë propozime dhe amendamente konkrete gjatë këtij procesi.

«Shqipëria ka nevojë për një sistem krejtësisht të ri zgjedhor, ku përfaqësimi i partive të garantohet mbi bazën e proporcionalitetit kombëtar, me lista të hapura që u mundësojnë zgjedhësve të vendosin se cilët deputetë do t’i përfaqësojnë dhe me sa më pak barriera për partitë që duan të marrin pjesë në garë», tha Bylykbashi.