Haziri i kërkon Presidentes të dekretojë ose të kthejë ligjin për Specialen

Çlirim Haziri, drejtues i iniciativës «JO NË EMRIN TIM», i bëri thirrje Presidentes së Republikës së Kosovës që ta dekretojë ose ta kthejë në Kuvend për rishqyrtim Ligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar. Haziri kërkoi angazhim të koordinuar shtetëror për proceset gjyqësore ndaj ish-udhëheqësve të Ushtrisë Çlirimtare të Kosovës.

Kjo kërkesë vjen pas angazhimeve të mëparshme të iniciativës në mbrojtje të ish-pjesëtarëve të UÇK-së, siç raportoi Zhurma më 7 tetor 2026 kur Haziri kërkoi lirimin e dy veteranëve të ndaluar pas votimit të ndryshimeve ligjore në Kuvend.

Në një konferencë për media, Haziri kujtoi se iniciativa e tij qëndroi për 21 ditë e 21 net në sheshet e Prishtinës, duke kërkuar përgjegjësi nga institucionet pas vendimit të 16 shtatorit, i cili konsiderohet i padrejtë nga organizatorët. Sipas Hazirit, nëse konstatohet se akti ligjor që ndodhet në Presidencë ka probleme apo dispozita që nuk përputhen me Kushtetutën, e para e shtetit duhet ta kthejë atë te deputetët për përmirësim. Drejtuesi i iniciativës theksoi se UÇK-ja ka nevojë për një ligj kushtetues, të zbatueshëm e në përputhje me standardet evropiane.

Ndër kërkesat e tjera, Haziri përmendi krijimin e një mekanizmi të pavarur e profesional për monitorimin e proceseve gjyqësore në bashkëpunim me universitete, institute dhe ekspertë të drejtësisë. Ky mekanizëm duhet të hartojë analiza juridike dhe vlerësime që do t'u dërgohen organizatave ndërkombëtare dhe institucioneve të Bashkimit Evropian. Ai po ashtu përshëndeti krijimin e komisionit qeveritar për hartimin e një strategjie shtetërore, duke kërkuar që puna e tij të nisë pa asnjë vonesë.

Sa i përket hapave të ardhshëm, iniciativa ka paralajmëruar se e ruan të drejtën për t'u rikthyer në protesta në shesh nëse institucionet zgjedhin heshtjen dhe nuk ndërmarrin veprime konkrete me afate të qarta.

«Nëse konstatohen dispozita që nuk janë në harmoni me Kushtetutën apo kanë çfarëdo problemi ligjor, kërkojmë që Presidentja ta ushtrojë kompetencën e saj kushtetuese dhe ta kthejë ligjin në Kuvend për rishqyrtim. Nëse ka nevojë, të ndryshohet e të përmirësohet çfarëdo që duhet ndryshuar e përmirësuar», ka deklaruar Haziri.

«Ne nuk kërkojmë drejtësi të privilegjuar për UÇK-në. Ne kërkojmë drejtësi të drejtë!», ka thënë ai.

«Nuk mund t’u ofrohet viktimave një gënjeshtër në emër të së vërtetës dhe të quhet drejtësi! Drejtësia për të akuzuarit dhe drejtësia për viktimat nuk janë dy kauza kundërshtare. Ato takohen në një pikë të vetme: te e vërteta», ka deklaruar ai.

«Fakti që nuk jemi më çdo natë në shesh nuk do të thotë se kemi hequr dorë nga kërkesat tona. Do ta ndjekim çdo vendim. Do ta vlerësojmë çdo veprim. Do të kërkojmë përgjigje për çdo zotim institucional», ka thënë Haziri.

«Nëse institucionet zgjedhin heshtjen në vend të përgjegjësisë, ne e ruajmë të drejtën tonë për t’u kthen në shesh, për të protestuar dhe për të kërkuar llogari», ka deklaruar ai.

«Përgjegjësia shtetërore nuk përfundon me një deklaratë, me një votim apo me krijimin e një komisioni. Ajo dëshmohet me veprime dhe rezultate», ka theksuar ai.