Çfarë diskutoi Haxhiu me Jasharin për tranzicionin e FSK-së drejt NATO-s?

PRISHTINË — Ushtruesja e detyrës së Presidentes së Kosovës, Albulena Haxhiu, është takuar me komandantin e Forcës së Sigurisë së Kosovës, gjenerallejtënant Bashkim Jashari, në një vizitë zyrtare tek FSK-ja.

Gjeneral Jashari e ka informuar Haxhiun për proceset aktuale të forcës, të arriturat dhe planet e zhvillimit. Të dyja palët kanë diskutuar fazën aktuale të Planit Gjithëpërfshirës të Tranzicionit, planifikimin afatgjatë dhe sfidat e forcës.

Është theksuar rëndësia e pjesëmarrjes së FSK-së në operacione ndërkombëtare jashtë vendit, me vlerësimin se kjo e pozicionon Kosovën si kontribuuese në sigurinë globale. Haxhiu ka përgëzuar Jasharin për rezultatet e treguara brenda dhe jashtë vendit.

Në përfundim, palët janë pajtuar për vazhdimin e zhvillimit të FSK-së drejt një force moderne dhe profesionale në rrugën drejt anëtarësimit në NATO.

Burim: Zëri
— Redaksia ZHURMA