Haxhiu: Strategjia duhet t’u shërbejë krerëve të UÇK-së në shkallën e apelit

Kryetarja e Kuvendit të Kosovës, Albulena Haxhiu, ka kërkuar që vëmendja e institucioneve të përqendrohet në hartimin e një strategjie që do t'u shërbejë krerëve të Ushtrisë Çlirimtare të Kosovës në shkallën e apelit në Hagë. Deklarata u bë pas mbledhjes së Kryesisë së Kuvendit, ku ajo njoftoi se Qeveria e Kosovës tashmë ka formuar grupin punues për përpilimin e këtij dokumenti.

Më parë, Qeveria ka ndërmarrë hapin për krijimin e grupit punues, ndërsa Kuvendi ka pranuar kthimin e ligjit për shqyrtim të mëtejshëm parlamentar. Haxhiu ka bërë me dije se lidhur me këtë ligj ka pasur edhe deklarime të mëparshme të bazuara në një gjykim të Gjykatës Kushtetuese për rastin e ish-presidentes Atifete Jahjaga.

Sa i përket procedurave parlamentare, Haxhiu njoftoi se ligjin e kthyer në Kuvend e ka adresuar te Komisioni për Legjislacion. Ajo sqaroi se nga juristët ekzistojnë dy interpretime të ndryshme rreth mundësisë së ndryshimit të ligjit pas kthimit në lexim të tretë: njëri grup mendon se vendimi mbetet vetëm të votohet ose jo, kurse grupi tjetër vlerëson se mund të bëhen ndryshime.

Komisioni për Legjislacion ka katër javë kohë për ta trajtuar ligjin e adresuar. Kryetarja e Kuvendit bëri të ditur se do të takohet me kryetarin e këtij komisioni për të diskutuar qëndrimet rreth procedurës që duhet ndjekur.

Haxhiu deklaroi para mediave: «Tashmë Qeveria e Republikës së Kosovës ka formuar grupin punues për hartimin e strategjisë, dhe unë gjithnjë kam kërkuar që e gjithë vëmendja, përqendrimi ynë të zhvendoset pikërisht te kjo strategji, që duhej apo do të duhej të përpilohej në atë mënyrë që t’u shërbejë krerëve të Ushtrisë Çlirimtare të Kosovës në shkallën e apelit. Pra, kam kërkuar vëmendje, seriozitet, profesionalizëm, që vëmendja dhe puna jonë të zhvendoset pikërisht te kjo strategji».

Ajo satoi më tej lidhur me procedurën ligjore: «Sa i përket ligjit, tashmë e kam adresuar kthimin e ligjit te Komisioni për Legjislacion. Komisioni për Legjislacion ka katër javë kohë; unë do të takoj sot kryetarin e Komisionit për Legjislacion, për të parë qëndrimet që Komisioni për Legjislacion i ka në këtë drejtim. Më lejoni që t’ju informoj që ka dy interpretime nga juristët; pra, një grup i juristëve që thekson se pas kthimit të ligjit në lexim të tretë, ky vendim mbetet vetëm ta votojë ose të mos e votojë. Dhe grupi tjetër është që mund të bëjë ndryshime në këtë drejtim. I mbetet Komisionit për Legjislacion që ta trajtojë këtë çështje. Ju e dini që unë kam pasur një deklarim për këtë, por deklarimi im është i bazuar vetëm në një gjykim të Gjykatës Kushtetuese, në rastin e presidentes Atifete Jahjaga».