Haxhiu: Nuk shoh arsye për heqjen e Kurtit nga posti i kryetarit të VV-së

Lëvizja Vetëvendosje ka mbledhur Këshillin e Përgjithshëm për të diskutuar rreth zhvillimeve politike dhe procesit zgjedhor që e pret këtë subjekt. Para fillimit të këtij takimi, kryetarja e Kuvendit, Albulena Haxhiu, e pyetur rreth mundësisë së ndryshimit të udhëheqjes partiake, është shprehur se nuk ka arsye për largimin e kryetarit aktual, duke shtuar se ai mbetet personaliteti më i mbështetur me vota në vend. «Është e rëndësishme që të fillojmë një proces të mirë zgjedhor. Kryetari i VV-së ka mbështetjen më të madhe qytetare. Nuk shoh asnjë arsye që VV-ja të bëjë diçka në këtë drejtim, pasi është personi më i votuar në Republikën e Kosovës», u shpreh Haxhiu për Klan Kosova, duke paralajmëruar gjithashtu se publiku do të njoftohet për vendimet përfundimtare të dala nga mbledhja e Këshillit të Përgjithshëm.

Ky organizim vjen pas takimit të përbashkët që drejtuesit e qendrave të Lëvizjes në Kosovë dhe në mërgatë patën ditë më parë, ku u pajtuan për hapjen e procesit të zgjedhjeve të brendshme. Sipas njoftimit zyrtar të partisë, ky proces vlerësohet si një mundësi kyçe për ripërtëritjen, konsolidimin dhe fuqizimin e strukturave organizative, si dhe për zgjerimin e pjesëmarrjes së anëtarësisë, avancimin e kuadrove dhe forcimin e lidhjes me qytetarët në çdo nivel të organizimit.