Bashkim Isufi kërkon transparencë për rrugën “Hamdi Kurteshi” në Gjilan

GJILAN — Bashkim Isufi ka kërkuar transparencë më të madhe në informimin e qytetarëve dhe qartësi në ndarjen e meritave për financimin e projekteve infrastrukturore në rrugën “Hamdi Kurteshi”. Reagimi i tij vjen pas përfundimit të shtrimit të shtresës së fundit të asfaltit, një projekt për të cilin ministri Dimal Basha ka bërë të ditur se vlera e përgjithshme e kontratës është 2.36 milionë euro, ku 2.3 milionë euro financohen nga Qeveria e Kosovës.

Sipas Isufit, nga shuma e përgjithshme, pjesa e mbetur prej rreth 60 mijë eurosh përbën kontributin financiar të Komunës së Gjilanit. Ai ka ngritur shqetësimin se në komunikimin publik të komunës është përdorur shprehja se jemi drejt fundit të një pune të madhe, pa u theksuar qartë se pjesa dërrmuese e financimit është siguruar nga qeveria qendrore, duke kërkuar që qytetarët të informohen saktë për kontributin real të secilit institucion.