Kombëtaret e Shqipërisë përgatiten për një kalendar të ngjeshur ndeshjesh në nëntor

Kombëtarja A e Shqipërisë do të zhvillojë dy ndeshjet e fundit të grupit C1 në Nations League gjatë muajit nëntor, me synimin për të mbrojtur vendin e parë në renditje. Skuadra kuqezi do të presë Finlandën më 12 nëntor në stadiumin “Air Albania” në orën 20:45, si dhe do të luajë në transfertë ndaj Bjellorusisë më 15 nëntor në orën 18:00 në stadiumin “Illovszky Rudolf”.

Përveç ekipit të parë, përfaqësueset e moshave dhe kategorive të tjera po ashtu kanë një kalendar të ngjeshur ndeshjesh zyrtare, miqësore dhe turnesh zhvillimorë gjatë këtij muaji. Ekipet Kombëtare do të zbresin në fushë për kualifikueset e Kampionatit Europian 2027, turnetë e UEFA-s dhe kualifikueset e Kupës së Botës në futsall.

Kombëtarja U-21 e drejtuar nga Alban Bushi do të luajë dy ndeshje miqësore në stadiumin “Air Albania” në orën 19:00, si pjesë e përgatitjeve për Kampionatin Europian U-21 2027 ku Shqipëria është një nga vendet organizatore. Skuadra do të përballet me Luksemburgun më 13 nëntor dhe me Spanjën më 17 nëntor. Ndërkohë, Kombëtarja U-19 do të luajë në raundin e dytë të kualifikueseve të Europianit 2027 ndaj Qipros më 11 nëntor dhe ndaj Armenisë më 14 nëntor në stadiumin “Sotira Municipal”. Përfaqësuesja U-17 do të zhvillojë raundin e parë të kualifikueseve në një mini-turne në Shqipëri, ku do të luajë në “Elbasan Arena” në orën 14:00 ndaj Suedisë më 11 nëntor, Skocisë më 14 nëntor dhe Finlandës më 17 nëntor.

Në kualifikueset e Europianit 2027 do të marrë pjesë edhe Kombëtarja U-19 e vajzave, e cila do t'i zhvillojë të gjitha ndeshjet në “Shtëpinë e Futbollit” në orën 14:00. Ato do të përballen me Qipron më 27 nëntor, Moldavinë më 30 nëntor dhe Letoninë më 3 dhjetor. Ndeshje ndërkombëtare do të ketë edhe për përfaqësueset e tjera kuqezi: Kombëtarja U-15 do të luajë në turneun UEFA Development në “Shtëpinë e Futbollit” ndaj Irlandës së Veriut më 19 nëntor, Polonisë më 21 nëntor dhe Ishujve Faroe më 24 nëntor. Kombëtarja e futbollit amator do të luajë në “Egnatia Arena” dy sfidat e UEFA Regions’ Cup ndaj Piemonte Valle d’Aosta më 1 nëntor dhe NI Eastern më 4 nëntor. Gjithashtu, Kombëtarja e futsallit do të luajë më 6 nëntor në orën 15:30 ndaj Bjellorusisë në sallën sportive “Humenne” në Sllovaki, në kuadër të fazës “Main Round” për kualifikueset e Kupës së Botës FIFA Futsal 2028.