Halil Snopçe kërkon çerdhe për Studeniçanin, ministri premton dy kopshte
Deputeti Halil Snopçe ngriti çështjen e mungesës së çerdheve në Studeniçan, ndërsa ministri Gjoko Vellkovski premtoi ndërtimin e dy çerdheve deri në fund të mandatit.
Redaksia ZHURMA · · 1 min lexim
Mungesa e çerdheve në komunën e Studeniçanit është trajtuar në seancën për pyetje deputetësh nga deputeti Halil Snopçe, i cili theksoi se kjo zonë me afërsisht 22 mijë banorë nuk posedon asnjë institucion parashkollor funksional. Referuar të dhënave të Entit Shtetëror të Statistikave, ai bëri të ditur se në këtë komunë llogariten 2577 fëmijë të grupmoshave përkatëse, ndërsa numri i të regjistruarve mbetet zero.
Sipas deputetit të Aleancës për Shqiptarët, situata u rëndua kur gjatë rebalansit të buxhetit u refuzua amendamenti i opozitës për sigurimin e një projekti çerdheje që do t'i shërbente 55 fëmijëve. Nga ana e tij, ministri i Politikës Sociale, Gjoko Vellkovski, u përgjigj duke premtuar se deri në përfundim të mandatit qeveritar në këtë komunë do të ndërtohen dy çerdhe. Ai sqaroi se refuzimi i amendamentit erdhi për shkak të procedurave pronësore që kërkojnë kohë për t'u zgjidhur dhe se aktualisht po përgatitet dokumentacioni teknik në bashkëpunim me kryetarin e komunës, ndërsa njëra parcelë është zgjidhur tashmë.
