Kuvendi konstatoi dorëheqjen e zëvendësministrit Jovica Andovski

Kuvendi ka konstatuar dorëheqjen e zëvendësministrit të Shëndetësisë, Jovica Andovski. Nënkryetari i Kuvendit, Antonio Milloshoski, bëri të ditur se deri në fillimin e seancës, Andovski nuk kishte dorëzuar njoftim për arsyetimin e dorëheqjes, duke shtuar se sipas Rregullores së Kuvendit atij i përfundon mandati si zëvendësministër që drejton Ministrinë e Shëndetësisë. Andovski më parë kishte dhënë dorëheqje nga funksioni për arsye personale, duke shprehur mirënjohje për mundësinë e qenë pjesë e Qeverisë pasi ishte propozuar në korrik të vitit 2024.

Gjatë seancës së 126-të, deputetët miratuan rendin e ditës dhe para shqyrtimit të pikave zhvilluan pyetje parlamentare të opozitës. Në agjendë u përfshinë disa çështje, mes të cilave projektligji për ratifikimin e Protokollit të Tretë të Marrëveshjes së Përgjithshme për Privilegjet dhe Imunitetet e Këshillit të Evropës, propozimi për zgjedhjen e një komisioneri të jashtëm të Komisionit të Letrave me Vlerë, si dhe projektvendimi për dërgimin e pjesëtarëve të Ushtrisë në operacionin ndërkombëtar të Bashkimit Evropian – ALTEA në Bosnjë dhe Hercegovinë. Po ashtu u shqyrtuan projektvendimi për emërimin e kryetarit dhe anëtarëve të bordit për dhënien e çmimit shtetëror «Goce Dellçev», projektligji i ndryshuar për auditimin shtetëror në lexim të tretë, projektvendimi për zgjatjen e periudhës së gjendjes së krizës për shkak të furnizimit me naftë dhe kërkesa për interpretim autentik të Ligjit për Marrëdhëniet e Punës. Kuvendi nuk e miratoi propozimin që në rend dite të përfshihej përmes procedurës së shkurtuar Ligji për Mbështetjen Financiare për Zvogëlimin e Pasojave të Krizës Ekonomike në Prodhimin Bujqësor dhe Blegtoral dhe Blerjen e Produkteve Bujqësore në vitin 2026.