Guri: Betejat me Abdixhikun pengojnë votimin e Sejdiut për president

Sipas deputetit të Lidhjes Demokratike të Kosovës, Paris Guri, qëndrimi i gjashtë ligjvënësve të kësaj partie për të mos mbështetur marrëveshjen me Lëvizjen Vetëvendosje lidhur me kandidaturën e Bekim Sejdiut për postin e presidentit mund të lidhet me përplasjet e brendshme politike ndaj kryetarit Lumir Abdixhiku. Gjatë një prononcimi, ai ka theksuar se ky mbetet vetëm një hamendësim personal, duke shtuar se arsyet e vërteta dihen vetëm nga vetë deputetët që kundërshtuan këtë akord.

Guri ka kujtuar se gjatë diskutimeve të mëparshme në grupin parlamentar kishte dakordësi për të gjetur një figurë me mbështetje më të gjerë dhe për t'i ofruar vendit institucione pas një periudhe pa to. Duke bërë thirrje për tejkalimin e hatërmbetjeve dhe inateve personale për hir të interesit të Kosovës, ai ka përmendur gjithashtu se rezultati i arritur në negociata ka qenë shumë më i mirë sesa pritshmëritë e tyre fillestare brenda partisë.