Gonzalez Vazquez zëvendëson Sokol Jarecin në krye të arbitrave
Spanjolli Bernardino Gonzalez Vazquez merr zyrtarisht drejtimin e Departamentit të Arbitrimit në FSHF, duke zëvendësuar Sokol Jarecin.
TIRANË — Spanjolli Bernardino Gonzalez Vazquez ka marrë zyrtarisht detyrën si drejtor i ri i Departamentit të Arbitrimit në Federatën Shqiptare të Futbollit, duke zëvendësuar në këtë post Sokol Jarecin. Gjatë prezantimit të tij, ku morën pjesë Zv.Presidenti i FSHF-së, Geri Çipi, dhe Kryetari i Bashkimit të Arbitrave Shqiptarë të Futbollit, Tahir Kastrati, u bë e ditur se ish-gjyqtari ndërkombëtar vjen me një rekomandim të veçantë nga shefi i gjyqtarëve në UEFA, Roberto Rosetti.
Ky zhvillim vjen pas njoftimit të mëparshëm të Federatës Shqiptare të Futbollit për emërimin e spanjollit në krye të arbitrave shqiptarë, ndërsa tashmë ai do të drejtojë gjithashtu Komitetin e Arbitrimit, Komisionin e Dizenjimit, Komisionin e Vlerësimit dhe Komisionin e Vëzhgimit.