Golden Eagle Ylli luan me Pejën ndërsa Rahoveci pret Prishtinën

Superliga e Kosovës në basketboll vazhdon këtë të diel me dy ndeshje që pritet të sjellin rivalitet dhe emocione, duke mbyllur xhiron e katërt të këtij edicioni. Ndeshja e parë zhvillohet nga ora 17:00, ku Golden Eagle Ylli përballet me Pejën në palestrën «13 Qershori» në Suharekë. Ylli hyn në këtë duel pas fitores ndaj Sigal Prishtinës, të cilën e regjistroi javën e kaluar, duke shënuar kështu fitoren e parë sezonale, ndërsa Peja kërkon të rikthehet te fitorja dhe te rezultatet pozitive pas disfatës nga Vëllaznimi. Të dyja skuadrat synojnë rezultate pozitive, duke marrë parasysh synimet e larta të tyre në këtë edicion, gjë që e bën këtë përballje edhe më interesante dhe mjaft të luftuar.

Ndeshja e dytë dhe e fundit e kësaj xhiroje luhet nga ora 19:30, mes Rahovecit 029 dhe Sigal Prishtinës, në palestrën «Mizahir Isma». Rahoveci vazhdon të kërkojë fitoren e parë të sezonit dhe është skuadra e vetme pa fitore deri më tani, duke zhvilluar ndeshjen e tretë para publikut vendas në katër xhirot e para. Vreshtarët do të përpiqen ta shfrytëzojnë përparësinë e fushës dhe të terrenit vendas për të regjistruar fitoren e parë. Ndërkohë, Sigal Prishtina udhëton drejt Rahovecit me synimin për të reaguar pas humbjes nga Ylli dhe për t'u rikthyer te rezultatet pozitive.