Gjykata Supreme lejon përkohësisht ndërtimin e sallës së Trump
Kryegjyqtari John Roberts pezulloi vendimet e mëparshme që kishin urdhëruar ndalimin e punimeve.
Kryegjyqtari i Gjykatës Supreme të SHBA-së, John Roberts, pezulloi përkohësisht vendimet e mëparshme gjyqësore që kishin urdhëruar ndalimin e punimeve për ndërtimin e sallës së re të vallëzimit në Shtëpinë e Bardhë. Urdhri i tij nuk jep arsyetime dhe do të mbetet në fuqi deri në një vendim të ri nga Roberts ose nga Gjykata e plotë Supreme.
Projekti, i cili vlerësohet të kushtojë rreth 400 milionë dollarë, parashikon ndërtimin e një salle prej rreth 8,400 metrash katrorë në vendin e krahut lindor të Shtëpisë së Bardhë, i cili u shemb me urdhër të administratës Trump. Administrata amerikane thotë se rreth 65 për qind e punimeve kanë përfunduar deri tani, ndërsa rreth 200 milionë dollarë nga donatorë privatë janë shpenzuar ose siguruar.
Shtëpia e Bardhë pretendon se presidenti ka autoritet të plotë për të bërë ndryshime dhe rinovime në ndërtesë, dhe se përfundimi i sallës lidhet me kërkesat e sigurisë kombëtare. National Trust for Historic Preservation e kundërshton projektin, duke theksuar se ai nuk ka marrë miratimin e Kongresit dhe akuzon administratën për nxituar punimet para vendimit përfundimtar të gjykatave.
Vendimi i Roberts është vetëm i përkohshëm dhe nuk e zgjidh çështjen. Gjykata Supreme duhet të përcaktojë nëse projekti mund të vazhdojë afatgjatë apo nëse kufizimet e urdhëruara nga gjykatat më të ulëta do të rikthehen.