Gjykata i vazhdon paraburgimin Fehim Salit për spiunazh

Gjykata Themelore ka vendosur për vazhdimin e paraburgimit edhe për dy muaj për mësimdhënësin nga Dragashi, Fehim Sali, i cili dyshohet për spiunazh te Shërbimi Inteligjent i Serbisë, siç konfirmoi zëdhënësja Mirlinda Gashi. Fehim Sali u arrestua nga Policia e Kosovës në pikën kufitare në Merdarë, ndërsa Prokurodia Speciale e Republikës së Kosovës ngre dyshime se ai ka operuar në territorin e Kosovës dhe të Serbisë për të siguruar përfitim material përmes bashkëpunimit me strukturat e huaja të inteligjencës.

Më parë, i pandehuri kishte përfaqësuar komunitetin goran në Këshillin Konsultativ për Komunitete pranë Presidencës, nga ku ishte shkarkuar. Pas arrestimit të tij në gusht të këtij viti, Gjykata Themelore në Prishtinë i kishte caktuar fillimisht masën e paraburgimit prej një muaji, ndërsa në muajin shtator i ishte vazhduar sërish masa për dy muaj të tjerë, për t'u pasuar nga vendimi i fundit i gjykatës.

Sipas dosjes së Prokurorisë Speciale, e cila u sigurua dhe u bë publike gjatë hetimeve, i pandehuri kishte rënë në duart e organeve të drejtësisë përmes masave të fshehta dhe dyshohet se veprimtarinë e tij e kryente duke përdorur katër telefona të ndryshëm për të kontaktuar agjentët e BIA-s serbe. Zëdhënësja e gjykatës, Mirlinda Gashi, përmes një përgjigjeje theksoi se gjyqtari i procedurës paraprake ka aprovuar kërkesën e PSRK-së përmes aktvendimit për vazhdimin e masës së paraburgimit në kohëzgjatje prej dy muajsh. Prokuroria pretendon se gjatë bastisjes në pronat e të pandehurit janë gjetur katër telefonat e përdorur për operacione, të cilët pritet të ekzaminohen, si dhe janë sekuestruar 40 mijë euro si rezultat i veprimtarisë së dyshuar të spiunazhit. Dosja e prokurorisë shton se Sali ka dy shtetësi, të Kosovës dhe të Serbisë, dhe se i njëjti ka përshkruar në mënyrë të detajuar takimet dhe veprimet e tij inkriminuese me zyrtarët e BIA-s. Sipas hetimeve të prokurorisë, informacioni i ofruar përfshinte situatën politike në Kosovë, identifikimin dhe fotografimin e zyrtarëve të Agjencisë së Kosovës për Inteligjencë për t'i identifikuar, si dhe propozimin e personave që i përkasin sektit vehabi si objektivë të mundshme për rekrutim. Ndërkohë, i pandehuri dyshohet se ka ndërmjetësuar për dokumente të lidhura me institucionet e Serbisë dhe ka mbajtur kontakte me persona me ndikim politik nga komunitetet jo shumicë, duke u ofruar orientime për veprim politik në interes të shërbimit inteligjent të huaj. Personat e përmendur në këtë çështje konsiderohen të pafajshëm derisa fajësia e tyre të vërtetohet me vendim të formës së prerë të gjykatës.