Shtyhet seanca për Erlis Dukën — avokatët thonë se nuk u njoftua sipas ligjit
Kundërshton vendimin e pafajësisë për Erlis Dukën, lidhur me vrasjen e ish-policit Santiago Malko
Tirane — Gjykata e Posaçme e Apelit shtyu seancën për shqyrtimin e ankimit të SPAK, i cili kundërshtoi vendimin e pafajësisë për Erlis Dukën, lidhur me vrasjen e ish-policit Santiago Malko.
Shkak për dështimin e seancës u bë pretendimi i avokatëve të Dukës që thanë se i mbrojturi prej tyre nuk ishte njoftuar sipas ligjit ndonëse avokatët ishin të pranishëm.
Gati 7 vite pas eliminimit të Malkos, Gjykata e Posaçme dha dënimin me 130 vite burg për 5 të pandehur mes të cilëve si porositës dhe organizator Leonard Dukën me 30 vite heqje lirie ndërsa shpalli të pafajshëm vëllain e këtij të fundit Erlisin.
Leonard Duka u arrestua në shkurt 2024 në Belgjikë dhe në gusht të atij viti u ekstradua në drejtim të Tiranës për t’u përballur me drejtësinë.
Gjykata e Posaçme dha dënime edhe për Fatmir Hysenin, Aleksadër Maxhakun, Dritan Agën dhe Oltion Lonën, pjesë e grupit të vrasjes, 25 vjet burg për secilin.
Për të njëjtën ngjarje, më herët janë dënuar edhe 2 të tjerë në dosje të ndarë për shkak të arrestimit të hershëm.
Blendi Teta përfundimisht do të vuaj 25 vite burg, pas një zvarritje të procesit.
Fillimisht me 25 vite u dënua nga Apeli, vendim që u prish nga Gjykata e Lartë, por që në dhjetor 2025 u vendos sërish për 25 vjet.
Po ashtu, i dënuar me vendim të formës së prerë për vrasjen e Santiago Malkos, është edhe Ilir Selmani, vendim që u prish nga Gjykata e Lartë dhe u rikthye për gjykim në Apel nga një tjetër trupë gjykuese e cila para disa dirësh e dënoi me 28 vite burg.
Gjatë rishqyrtimit të dosjes, Selmani doli për disa javë nga paraburgimi, pasi përfunduan afatet ligjore të masës së sigurisë.
Santiago Malko u qëllua për vdekje në Tiranë më 27 gusht 2019 dhe dyshimet janë se eliminimi u bë prej përplasjeve që Leonard Duka kishte me Ervis Martinaj, ky i fundit lidhje e ngushtë shoqërore e viktimës.
Ngjarja u zbardh e plotë prej komunikimeve në aplikacionin “SkyECC”, ku flitej për atentatin e rëndë.
Burim: Euronews Albania
— Redaksia ZHURMA
Të ngjashme
sipas temës · #shqiperi
Ndahet nga jeta akademiku Emin Riza, në moshën 89-vjeçare
Arrestohet në Angli shqiptari i dënuar me 24 vjet burg për vrasjen e vitit 1999
Mateo dhe Brikena flasin 7 orë në telefon — bisedat nisin në mesnatë
Bisedoni
Komentet janë të hapura për anëtarët e Zhurma. Llogaria është falas — krijo një ose hyr për me e thanë mendimin.