Gjykata e Lartë rishqyrton masën e sigurisë për Erion Veliajn

Gjykata e Lartë shqyrton masën e sigurisë ndaj kryebashkiakut të Tiranës, Erion Veliaj, pasi Gjykata Kushtetuese e ktheu çështjen për rishqyrtim. Seanca është caktuar në orën 09:30 në Dhomë Këshillimi.

Veliaj ndodhet në paraburgim që nga arrestimi më 10 shkurt 2025. Gjykata e Lartë duhet të arsyetojë nëse masa e arrestit me burg është proporcionale me pozicionin e tij si kryebashkiak.

Shumica e gjyqtarëve kushtetues çmoi se Gjykata e Lartë nuk kishte dhënë argumente të mjaftueshme për mbajtjen në burg të Veliajt, i cili është drejtues i zgjedhur i Bashkisë së Tiranës.

Rishqyrtimi zhvillohet pasi Gjykata e Lartë rishikoi një vendim unifikues të vitit 2011 për masën e sigurimit të arrestit në burg dhe kohëzgjatjen e tij. Sipas atij vendimi, masa e arrestit me burg duhet të merret vetëm pasi të jenë shqyrtuar realisht masat alternative.