Pse u paralajmë Gjorgjievski gjoba dhe masa të rrepta?

SHKUP — Kryetari i Qytetit të Shkupit, Orce Gjorgjievski, njoftoi se mbrëmjen e kaluar janë kapur persona duke hedhur në mënyrë të paligjshme mbetje ndërtimore dhe mbeturina në tri lokacione të ndryshme në kryeqytet. Sipas tij, rastet janë evidentuar në Komunën e Aerodromit dhe në zonën qendrore të qytetit, në rrugën “Ruzveltova”.

Në një postim në rrjetet sociale, Gjorgjievski bëri të ditur se autorët janë identifikuar menjëherë dhe janë urdhëruar të paraqiten në zyrat komunale, ku do t’u shqiptohen gjoba në përputhje me ligjin. Përveç kësaj, atyre u është urdhëruar që menjëherë të largojnë mbeturinat dhe t’i transportojnë në një deponi të autorizuar, duke dorëzuar edhe dëshmi për peshimin e mbetjeve.

Nëse nuk e bëjnë këtë, ndaj tyre do të ndërmerren masa shtesë. “Dua të jem i qartë – nuk do të lejoj që individë të shëmtojnë pamjen e Shkupit, të ndotin hapësirën ku jetojmë dhe të rrezikojnë të ardhmen e fëmijëve tanë. Për këto veprime nuk ka asnjë arsyetim. Nuk do të ketë tolerancë. Për shkatërrimin e Shkupit do të ketë përgjegjësi”, deklaroi Gjorgjievski.

Inspektorët janë në terren 24 orë në ditë dhe monitorojnë vazhdimisht shkeljet që dëmtojnë mjedisin, ndërsa u bëri thirrje qytetarëve të mos hedhin mbeturina të mëdha në vende të papërshtatshme, pasi një veprim i tillë dëmton përpjekjet për ta mbajtur qytetin të pastër dhe të rregullt.

Burim: Almakos, https://almakos.com/gjenden-persona-duke-hedhur-ilegalisht-mbeturina-ne-shkup-gjorgjievski-paralajmeron-gjoba-dhe-masa-te-rrepta/
— Redaksia ZHURMA