Pacientja me kancer të gjirit vdiq për mungesë Palbociclib

Shoqata e pacientëve me kancer "Renesansa" ka ngritur shqetësimin për mungesën e barnës Palbociclib në Kosovë, duke thënë se një paciente me kancer të gjirit mbeti katër muaj pa terapi për shkak të mungesës së barnës dhe pamundësisë për ta blerë atë me çmim të lartë. Sipas reagimit të Renesansës, pacientja, e cila kishte qenë në gjendje të mirë gjatë trajtimit, vdiq pasi iu shfaqën metastaza të reja në tru. Shoqata ka kërkuar përgjegjësi nga institucione të ndryshme, duke veçuar Qendrën Klinike Universitare të Kosovës (QKUK), Shërbimin Spitalor dhe Klinik Universitar të Kosovës (ShSKUK) dhe Ministrinë e Shëndetësisë.

Sipas Ekonomisë Online, Palbociclibi, i cili përdoret në trajtimin e kancerit të avancuar të gjirit, mungoi për katër muaj në Klinikën e Onkologjisë, edhe pse është pjesë e Listës Esenciale të Barnave. Pacientët që detyrohen ta blejnë vetë këtë bar, përballen me kosto deri në 1 mijë e 800 euro. Epoka e Re dhe Koha.net kanë raportuar se Palbociclibi ka disa ditë që mungon sërish në Klinikën e Onkologjisë, duke bërë që pacientët të detyrohen të paguajnë nga xhepi për barna të tjera që duhet të jenë të qasshme përmes sistemit publik shëndetësor.