Gjoba deri në 10 milionë lekë dhe kompetenca të reja për AKSK-në

Qeveria ka miratuar ndryshimet në projektligjin për sigurinë kibernetike, duke vendosur gjoba nga 200 mijë deri në 10 milionë lekë për shkeljen e detyrimeve nga operatorët e infrastrukturave kritike dhe të rëndësishme të informacionit. Këto ndryshime vijnë pas miratimit të mëparshëm të projektligjit nga Këshilli i Ministrave, duke forcuar kuadrin rregullator dhe masat ndëshkimore për mbrojtjen e sistemeve informatike në vend.

Sipas të dhënave të bëra publike, projektligji parasheh që operatorët duhet të deklarojnë pranë Autoritetit Kombëtar për Sigurinë Kibernetike masat teknike, organizative dhe operacionale të marra për mbrojtjen e sistemeve. Për mosdorëzimin e vetëdeklarimit në afat parashikohen gjoba nga 500 mijë deri në 2 milionë lekë, ndërsa për të dhëna të pasakta apo të paplota gjobat variojnë nga 200 mijë deri në 1 milion lekë, sipas Top Channel. Shkeljet e tjera administrative mund të arrijnë vlerën deri në 10 milionë lekë.

Ndryshimet parashikojnë krijimin e një grupi bashkëpunimi për inteligjencën kibernetike që do të drejtohet nga AKSK, ku do të marrin pjesë përfaqësues të Ministrisë së Jashtme, Ministrisë së Brendshme, Shërbimit Informativ të Shtetit, Shtabit të Përgjithshëm të Forcave të Armatosura dhe Agjencisë së Inteligjencës dhe Sigurisë së Mbrojtjes. Ky grup do të merret me shkëmbimin e informacioneve për kërcënimet dhe vlerësimin e ndikimit të tyre në sigurinë kombëtare dhe ekonomi.

Ligji forcon gjithashtu rolin e Autoritetit Kombëtar për Sigurinë Kibernetike, i cili do të pajiset për herë të parë me atributet e Policisë Gjyqësore për hetimin teknik të incidenteve, në bashkëpunim me Policinë e Shtetit, siç njofton Shqiptarja. Gjithashtu, lista e operatorëve të infrastrukturave kritike do të jetë konfidenciale, e miratuar me vendim të Këshillit të Ministrave dhe e përditësuar të paktën një herë në dy vjet.