GJKKO dënon 6 zyrtarë të Divjakës për shkelje në tendera me punë komunitare

TIRANË — Gjykata e Posaçme kundër Korrupsionit dhe Krimit të Organizuar (GJKKO) shpalli sot, 28 korrik, fajtorë gjashtë zyrtarë të Bashkisë Divjakë, të akuzuar nga SPAK për shkelje të barazisë së pjesëmarrësve në tenderë publikë me vlerë rreth 1 milion euro, duke ua kthyer dënimet me burg në punë komunitare ose në periudhë prove.

Të dënuarit janë Dorjan Spaho, Sara Xhepa (Doko), Roklejd Malko, Fatos Veliu, Elbareta Nishica — drejtoreshë e planifikimit të zhvillimit të territorit — dhe Vojsava Leçini. Akuza ndaj tyre ishte “shkelje e barazisë së pjesëmarrësve në tendera apo ankande publike”, kryer në bashkëpunim, sipas nenit 258 dhe 25 të Kodit Penal.

Trupi gjykues i përbërë nga Erjon Bani, Bib Ndreca dhe Paulin Çera dha vendimin nr. 62, datë 28.07.2026, pas një gjykimi të shkurtuar që nisi në prill 2026. Secili prej të gjashtëve u dënua fillimisht me 1 vit burgim, ulur në 8 muaj për shkak të gjykimit të shkurtuar.

Për Dorjan Spahon, Sara Xhepën dhe Roklejd Malkon, gjykata pezulloi ekzekutimin e dënimit me burg dhe e zëvendësoi me 120 orë punë në interes publik, pa shpërblim, të kryhen brenda 6 muajve nën mbikëqyrjen e Shërbimit të Provës.

Fatos Veliu, Elbareta Nishica dhe Vojsava Leçini u dënuan po ashtu me 8 muaj burgim të pezulluar, por me vënie në provë për 16 muaj dhe ndalim prej 5 vjetësh nga ushtrimi i funksioneve publike, sipas nenit 35 të Kodit Penal.

Hetimi lidhet me tre procedura tenderimi të zhvilluara nga Bashkia Divjakë, me vlerë të përgjithshme rreth 1 milion euro, dhe u nis si degëzim i një dosjeje tjetër. Paralelisht vijon hetimi ndaj kryebashkiakut Fredi Kokoneshi. Vendimi mund të apelohet brenda 15 ditësh në Gjykatën e Apelit kundër Korrupsionit dhe Krimit të Organizuar.

Burim: Lapsi.al
— Redaksia ZHURMA