Gjenden eshtrat e alpinistit belg të zhdukur më 2024

PESHKOPI — Policët kufitarë të Maqedonisë së Veriut kanë gjetur mbetjet mortore dhe sendet personale të alpinistit belg, Mark Joris, i cili ishte zhdukur pa lënë gjurmë dy vite më parë gjatë një ecjeje malore në zonën kufitare midis Shqipërisë dhe Maqedonisë së Veriut, raporton IndeksOnline.

Sipas informacioneve të shpërndara nga vajza e tij, Tine Joris, zbulimi ndodhi të shtunën në një shpat mali midis zonës së njohur si Guri i Zi dhe liqenit të Podgoreçit, ku trupat kufitare po zhvillonin një kërkim për një çështje tjetër.

Në vendngjarje u gjet çanta e shpinës e mbyllur, brenda së cilës ndodheshin tenda, thesi i gjumit, dy telefona celularë, një këpucë mali dhe një kapelë, kurse Njësia e Personave të Zhdukur konfirmoi identitetin e 72-vjeçarit përmes numrit IMEI të telefonave.

Joris, një adhurues i pasionuar i alpinizmit dhe ish-trombonist i pensionuar i Brussels Philharmonic nga Mortsel i Belgjikës, kishte planifikuar të kalonte disa ditë i vetëm duke ecur dhe kampuar në natyrë të hapur në shtegun e njohur ndërkombëtar High Scardus Trail.

Ai arriti në bujtinën malore Alp Stanet e Hinoskes në Peshkopi më 9 shtator 2024, ku qëndroi për dy netë, dhe më pas u nis drejt fshatrave Bitushë dhe Modriç të Maqedonisë së Veriut, ku mori ndihmë nga një familje vendase gjatë motit të lig me shi.

Pas largimit nga kjo familje mikpritëse, alpinisti humbi kontaktet me të afërmit dhe nuk arriti të kapte fluturimin e tij të parashikuar nga aeroporti i Tiranës, gjë që shtyu policinë federale belge të shpallte zyrtarisht zhdukjen e tij më 19 shtator të atij viti.

Pavarësisht operacionit të gjerë të kërkimit dhe fushatave private për mbledhjen e fondeve që kushtonin 3.000 euro për çdo orë fluturimi me helikopter, familja tashmë pranon se ai ka rrëshqitur aksidentalisht duke humbur jetën në atë që do të ishte etapa e fundit e udhëtimit të tij.

Burim: IndeksOnline
— Redaksia ZHURMA