Gjashtë raste të dhunës në familje të raportuara brenda një ditë

PRISHTINË — Gjashtë raste të dhunës në familje, kanosjes dhe ngacmimit janë regjistruar gjatë 10 nëntorit në disa qytete, ndërsa autoritetet kanë ndalur disa persona të dyshuar. Në Prishtinë janë shënuar tri raste të veçanta, ku përfshihen dyshime për dhunë fizike dhe psikike ndaj anëtarëve të familjes dhe një të miture. Në njërin nga rastet në kryeqytet, një burrë është arrestuar nën dyshimin se ka ushtruar vazhdimisht dhunë ndaj nënës dhe motrës, ndërsa një tjetër është ndalur për dhunë psikike ndaj bashkëshortes. Ndërkaq, rasti i një të mituri që dyshohet se ka përjetuar dhunë psikike nga prindërit do të procedohet në rrugë të rregullt me urdhër të prokurorit.

Në qytete të tjera, autoritetet kanë ndërhyrë për ngjarje të ngjashme. Në Graçanicë, një grua ka lajmëruar se ka marrë vazhdimisht mesazhe kërcënuese nga ish-bashkëjetuesi i saj, i cili është dërguar në mbajtje pas arrestimit. Në Gjakovë, dy vëllezër janë ndalur pas një përleshjeje fizike mes tyre, kurse në Leposaviq një grua ka pësuar lëndime pas një sulmi fizik ku dyshohen bashkëshorti dhe vjehrri i saj.