Gashi: Maria Clara ishte e vetëdijshme dhe komunikonte pas rënies nga kati i gjashtë

Doktoresha Blerina Gashi, dëshmitare e mbrojtjes në rastin ndaj Endrit Nikës, ka deklaruar se shtetasja argjentinase Maria Clara Urdangaray ishte e vetëdijshme, lëvizte dhe komunikonte me ekipin mjekësor pas rënies nga kati i gjashtë i hotelit në Fushë-Kosovë.

Gjykata Themelore në Prishtinë më 19 shkurt 2026 e kishte dënuar Endrit Nikën me 18 vjet burgim për veprën penale «Vrasje e rëndë». Gjykata e Apelit e kishte aprovuar ankesën e mbrojtjes dhe e kishte kthyer rastin në rigjykim. Prokuroria Themelore në Prishtinë kishte ngritur aktakuzën më 11 shkurt 2025. Nika akuzohet se më 1 gusht 2023, pas një mosmarrëveshjeje me të dashurën e tij, fillimisht e kishte goditur dhe tentuar ta shkelte me veturë në parking, e më pas në dhomën e hotelit e kishte shtyrë drejt qoshes, ka nxjerrë kornizën e dritares dhe e ka hedhur nga kati i gjashtë. Urdangaray kishte ndërruar jetë në QKUK nga lëndimet e marra.

Gjatë dëshmisë në seancën e rigjykimit, doktoresha Gashi nga QKMF-ja e Fushë-Kosovës tregoi se kishte qenë pjesë e ekipit të autoambulancës që e kishte marrë pacienten. Ajo tha se rrugët e frymëmarrjes të pacientes kishin qenë të lira, nuk kishte pasur fraktura të jashtme të vërejtura dhe gjatë gjithë rrugës kishte komunikuar me të në gjuhën angleze. Gashi u shpreh se e kishte pyetur pacienten nëse kishte tentuar të hudhej vetë apo nëse e kishte shtyrë dikush, dhe pacientja u përgjigj negativisht në të dyja pyetjet. Dëshmitarja shtoi se i ka dërguar email prokurorit të shtetit për të sqaruar se nuk ekziston një dokument në QKUK.