FSK organizon ushtrimin “Digital Siege 2026” për sigurinë kibernetike

Forca e Sigurisë së Kosovës ka organizuar ushtrimin ndërinstitucional “Digital Siege 2026”, i cili u realizua nga Njësia e Sinjaleve dhe Kibernetikës përmes Qendrës Shtetërore Trajnuese për Siguri Kibernetike. Ky aktivitet u zhvillua në bashkëpunim me kompaninë SimSpace dhe përfshiu pjesëmarrjen e përfaqësuesve nga institucionet publike, akademike dhe bankare të Republikës së Kosovës.

Sipas njoftimit zyrtar, qëllimi i ushtrimit ishte avancimi i kapaciteteve profesionale, testimi i gatishmërisë për reagim ndaj incidenteve kibernetike dhe forcimi i bashkëpunimit ndërinstitucional. Krahas pjesës teorike, pjesëmarrësit u angazhuan në skenarë dhe simulime praktike për trajtimin, menaxhimin dhe koordinimin përballë kërcënimeve në hapësirën kibernetike.

«Realizimi i këtij ushtrimi synon të kontribuojë në forcimin e kapaciteteve të institucioneve të Kosovës për të reaguar në mënyrë efektive ndaj incidenteve dhe kërcënimeve kibernetike», thuhet në njoftimin e FSK-së, e cila vlerësoi rëndësinë e përgatitjes profesionale përballë sfidave në rritje të sigurisë.