Fruthi në Kosovë: 151 raste të konfirmuara, 4 të reja gjatë javës

Gjatë javës së fundit në Kosovë janë shënuar katër raste të reja me fruth, duke e çuar në 151 numrin e përgjithshëm të të infektuarve që nga prilli. Instituti Kombëtar i Shëndetësisë Publike të Kosovës (IKShPK) ka bërë të ditur se shumica dërrmuese e rasteve, mbi 95 për qind, janë te personat që nuk e kanë marrë vaksinën MMR.

Instituti ka theksuar se vaksinimi mbetet masa më e sigurt për mbrojtjen e fëmijëve dhe parandalimin e përhapjes së sëmundjes. Përveç imunizimit të rregullt, është intensifikuar edhe vaksinimi i vonuar për fëmijët që kanë lënë pas dozat. Gjatë këtij viti, rreth 2,500 fëmijë të moshës 2–5 vjeç janë vaksinuar në kuadër të këtij programi.

IKShPK u ka bërë thirrje prindërve që të sigurohen se fëmijët e tyre janë të vaksinuar, duke nënvizuar se çdo fëmijë i vaksinuar është një hap më afër ndërprerjes së përhapjes së fruthit.