Forbes: Paul McCartney bëhet miliarder dhe renditet muzikanti i tretë më i pasur

Muzikanti Paul McCartney është bërë miliarder pasi pasuria e tij neto vlerësohet në rreth 1.4 miliardë dollarë, duke u renditur si muzikanti i tretë më i pasur në botë sipas vlerësimeve të revistës Forbes. Ish-anëtari i grupit Beatles qëndron pas reperit Jay-Z, pasuria e të cilit vlerësohet 2.8 miliardë dollarë, dhe këngëtares Taylor Swift me 2 miliardë dollarë.

Një pjesë e konsiderueshme e pasurisë së tij rrjedh nga kompania botuese MPL Communications, e krijuar prej tij në vitin 1969. Kjo ndërmarrje administron katalogun e tij personal si dhe të drejtat e autorit për krijimtarinë e artistëve të tjerë, përfshirë katalogun e Buddy Holly, partiturat e shfaqjeve teatrale të Broadway-t dhe këngë festive si «Baby, It’s Cold Outside» dhe «Blue Christmas».

Përveç kësaj, McCartney përfiton 25 për qind të të ardhurave nga kompania Apple Corps e Beatles, e cila gjeneron rreth 50 milionë dollarë në vit nga transmetimi në platforma muzikore, shitjet e albumeve dhe produktet promocionale. Forbes vlerëson se kjo rrjedhë të me të ardhura vlen më shumë se 150 milionë dollarë për çdo anëtar ose pasurinë e tyre, ndërsa vetë McCartney fiton rreth 10 milionë dollarë në vit nga të drejtat e autorësisë për këngët e Beatles pas një beteje të gjatë ligjore.

Fitimet e tij janë plotësuar gjithashtu nga pronat e paluajtshme, koleksioni i artit me vepra të artistëve si Magritte dhe Picasso, si dhe turnetë botërore. Turneu i tij i madh «Got Back» përfshiu 79 koncerte përgjatë viteve 2022-2025. Për më tepër, ai publikoi këtë vit albumin e tij të 20-të solo të titulluar «The Boys of Dungeon Lane», ndërsa jeta e tij pas ndarjes nga Beatles dhe periudha me grupin Wings paraqiten në dokumentarin «Man on the Run» me regji të Morgan Neville.