Plagoset një person nga të shtënat ndaj një makine në Prizren

Një person ka mbetur i plagosur pasditen e sotme në rrugën 'Liman Shala' në Prizren, pas një fjalosjeje ndërmjet një personi të dyshuar në njërën anë dhe tre personave të tjerë në anën tjetër. Zëdhënësi i policisë për rajonin e Prizrenit, Shaqir Bytyqi tha se i dyshuari ka shtënë me armë zjarri në drejtim të automjetit të palës tjetër. Personi i lënduar është dërguar për trajtim në Spitalin Rajonal të Prizrenit dhe, sipas mjekëve, ndodhet jashtë rrezikut për jetën.

Sipas Bytyqit, të gjithë personat e përfshirë në incident janë identifikuar. Përveç personit të lënduar, të tjerët janë shoqëruar në Stacionin Policor në Prizren. Në vendin e ngjarjes kanë dalë hetuesit e Sektorit Rajonal të Hetimeve, së bashku me njësinë e forenzikës, me qëllim të grumbullimit të provave dhe sigurimit të dëshmive materiale.

Policia, në koordinim me Prokurorin e Shtetit, është duke ndërmarrë të gjitha veprimet e nevojshme hetimore për zbardhjen e plotë të rrethanave dhe motiveve të këtij incidenti.

Burim: Lajmi.net, https://lajmi.net/fjalosje-mes-kater-personave-ne-prizren-njeri-plagoset-me-arme-zjarri/
— Redaksia ZHURMA