Shtie me armë ndaj punëtorëve të ujësjellësit pasi ia ndërprenë ujin
Rasti ndodhi në Pantinë të Vushtrrisë kur ekipi po ndërpiste kyçjen e ujit, ndërsa i dyshuari i kërcënoi me vrasje para se të ikte.
Redaksia ZHURMA · · Përditësuar · 1 min lexim
VUSHTRRI — Një incident i rëndë ka ndodhur në fshatin Pantinë të Vushtrrisë, ku 41-vjeçari Fitim Shabani dyshohet se ka shtënë me armë zjarri në drejtim të punëtorëve të KRU “Mitrovica”. Ngjarja ka ndodhur të mërkurën rreth orës 11:50, pasi ekipi po ndërpiste kyçjen e tij në rrjetin e ujësjellësit.
Sipas dëshmisë së tre punëtorëve të KRU-së — S.H. (50), F.B. (35) dhe F.Sh. (61) —, i dyshuari fillimisht u kishte drejtuar një armë të shkurtër duke kërkuar rikthimin e ujit. Pasi ata refuzuan, Shabani dyshohet se qëlloi me armë në drejtim të automjetit ku ndodheshin punëtorët.
Pas të shtënës, i dyshuari thuhet se mori gëzhojën e plumbit dhe hyri në oborrin e tij. Ai u kthye sërish për t'i kërcënuar ata se do t'i vriste nëse e lajmëronin rastin në Polici. Pas incidentit, në Pantinë kanë dalë njësi të shumta policore.
Policia e Kosovës kreu bastisje në shtëpinë e Shabanit me urdhër të prokurorit, krijoi një perimetër të gjerë sigurie, por arma e përdorur nuk u gjet. Ndaj të dyshuarit, i cili ndodhet në arrati, është iniciuar rasti për kanosje dhe përdorim e armëmbajtje pa leje.
Burim: Sinjali
— Redaksia ZHURMA
