Çfarë kushtesh duhet të plotësojë Dortmundi për të transferuar Asllanin?
Sulmuesi i Kosovës është 'shumë i hapur' për të kaluar në Bundesligë, por largimet e Guirassyt ose Adeyemit vendosin fatin e marrëveshjes.
GJERMANI — Fisnik Asllani, sulmuesi 23-vjeçar i kombëtares së Kosovës që aktivizohet te Hoffenheimi, vazhdon të jetë në listën e synimeve të Borussia Dortmundit, sipas raportimit të gazetës gjermane “Bild”.
Sipas burimeve të publikimit, kanë pasur biseda të reja mes përfaqësuesve të Asllanit dhe drejtuesve të Dortmundit. Asllani raportohet se është “shumë i hapur” për një transferim te klubi gjerman.
Megjithatë, Dortmundi thekson se hapat konkretë do të ndërmerren vetëm pasi të qartësohen largimet nga skuadra aktuale. E ardhmja e Serhou Guirassyt dhe Karim Adeyemit është vendimtare: nëse të dy qëndrojnë, transferimi i Asllanit bëhet i vështirë; nëse njëri largohet, negociatat mund të përshpejtohen.
Asllani ka bërë emër fillimisht tek Elversbergu, ku impresionoi si i huazuar, dhe ka vazhduar formën e mirë te Hoffenheimi. Raportohet se ekziston klauzolë largimi prej rreth 30 milionë euro për klubet e Ligës së Kampionëve, dhe rreth 25 milionë euro për të tjerat. RB Leipzigu gjithashtu ka shfaqur interes.
Drejtori sportiv Ole Book, që e njeh Asllanin nga koha e tyre tek Elversbergu, është mbështetës i fortë i transferimit.
Burim: Gazeta Express
— Redaksia ZHURMA