Kush po ndërton kompleks luksoz në rezervatin e flamingove në Shqipëri?

ZVËRNEC — Jared Kushner dhe Ivanka Trump janë përfshirë në një projekt masiv për ndërtimin e një kompleks banimi luksoz në bregdetin e Zvërnecit, një zonë që për dy dekada ka shërbyer si rezervat natyror i çmuar për shpendët shtegtarë në Adriatik. Projekti, që shihet si një kërcënim për ekosistemin, ka shkaktuar reagime të forta dhe protesta të vazhdueshme në Tiranë.

Sipas një dokumenti prej 97 faqesh të titulluar “Vision Master Plan”, i hartuar në nëntor 2025, plani parashikon ndërtimin e hoteleve, vilave, qindra apartamenteve, një fushës golfi, kazinoje dhe një parku ujor. Sipërfaqja totale e ndërtuar kap mbi 700 mijë metra katrorë, ndërsa një pjesë e lagunës, e cilësuar si “monument natyror”, është destinuar për një marinë dhe klub jahtesh.

Investimi, i vlerësuar në rreth 2 miliardë euro, realizohet nga Kushner dhe bashkëshortja e tij, në bashkëpunim me Kastrati Group në Shqipëri dhe Assets Group me bazë në Katar. Zhvilluesit këmbëngulin se projekti do ta respektojë mjedisin, ndërkohë që aktivistë si Joni Vorpsi nga OJQ-ja për mbrojtjen e mjedisit thonë se po ndërtohet në fakt një qytet në pjesën më të egër të Adriatikut.

Këto ndërtime janë bërë të mundshme pas një ndryshimi ligjor në vitin 2024, i mbështetur nga kryeministri Edi Rama, i cili lejon ndërtimet turistike në rezervatet natyrore nëse projekti është i kategorisë 5 yje ose më lart. Vetëm dy javë pas këtij ndryshimi, u publikuan pamjet ilustruese të projektit në gadishullin e mbrojtur të Zvërnecit.

Protestat, të cilat u nisën pas një videoje ku një banor vendas tërhiqej me dhunë nga rojet e sigurisë, kanë kërkuar dorëheqjen e kryeministrit. Protestuesit deklarojnë se toka e Shqipërisë nuk është në shitje dhe shprehin frikën se flamingot rozë, simboli i zonës, mund të largohen përgjithmonë për shkak të shkatërrimit të kodrinave dhe tharjes së kënetës.

Situata ka tërhequr vëmendjen edhe të Parlamentit Evropian, i cili në mesin e qershorit bëri thirrje për vendosjen e një moratoriumi mbi të gjitha ndërtimet dhe lejet e reja në zonat e mbrojtura. Europianët kërkuan gjithashtu shfuqizimin e ndryshimit ligjor për projektet “5 yje”, duke pasur parasysh procesin e anëtarësimit të Shqipërisë në BE.

Aktualisht, punimet në kantier duken të ndaluara, pasi javën e kaluar nuk janë vërejtur kamionë apo punëtorë dhe gardhi i ri është hequr. Qeveria ka deklaruar se një masterplan është shqyrtuar dhe refuzuar, dhe se një plan i ri do t'i nënshtrohet një vlerësimi të thelluar të ndikimit në mjedis përpara çdo hapi tjetër.

Burim: Monitor
— Redaksia ZHURMA